პროვოკაციული ოპტიკური ილუზია

IMG_19481960-იანი წლები ხელოვნების სხვადასხვა პოპულარული მიმდინარეობის დაბადების ათწლეულია. ერთ-ერთი გამორჩეული Op Art ანუ ოპტიკური ხელოვნებაა, რომელმაც ქარის სისწრაფით მოიცვა ხელოვნების ყველა დარგი არქიტექტურიდან დაწყებული, სამოსის დიზაინით დამთავრებული. ოპტიკურ ილუზიას ადამიანის მხედველობის სისტემა შეჰყავს შეცდომაში,  არარსებულის ან რეალურად არსებულის არასწორად წარმოსახვით. ოპ არტის ნამუშევრები ძირითადად შავ-თეთრი ფერებშია შესრულებული, რომელიც მოძრაობის, უხილავი გამოსახულებებისა და ვიბრაციების წარმოსახვას იწვევს. ხშირად, შეცდომით, ოპ არტსა და პოპ არტს ერთმანეთთან აიგივებენ, მაგრამ შემოქმედებითი მსგავსება მათ შორის  არ არსებობს. ჩემი ბლოგი გაგაცნობთ ზოგადად ოპ არტსა და მის გავლენას მოდის ინდუსტრიაზე.

სახელწოდება ოპ არტი პირველად ჟურნალ „ტაიმში“ გამოჩნდა 1964 წელს, თავდაპირველი ნამუშევრების შექმნიდან რამდენიმე წლის შემდეგ. მის წარმოშობას გასული საუკუნის დასაწყისში, რუსეთში დაბადებულ კონსტრუქტივიზმს უნდა ვუმადლოდეთ. 1965 წელს გამართული გამოფენის “The Responsive Eye” (“დამყოლი თვალი“)  დამსახურებით, ოპ არტის პოპულარობამ პიკს მიაღწია. მართალია კრიტიკოსებმა სერიოზულად არ მიიღეს ხელოვნების ახალი მიმდინარეობა და მას უბრალოდ თვალის მატყუარა უწოდეს, მაგრამ მალევე, ამგვარი გამოსახულებები უამრავ კომერციულ კონტექსტში გამოიყენეს. მიმდინარეობის წარმომადგენლის ბრიჯიტ რაილის ნამუშევარი, ერთ-ერთმა ამერიკულმა კომპანიამ ტანსაცმლის ნაჭრის დიზაინში უკანონოდ გამოიყენა.

victor Vasarely Vega

Victor Vasarely – Vega

ოპ არტში თავმოყრილია აღქმის განცდები, რომლებიც ხედვის ფუნქციებს ემყარება. ეს დინამიური ვიზუალური ხელოვნებაა,  რომელიც ეფუძნება ფიგურებისა და ფორმის ურთიერთქმედებას. შედეგად ვიღებთ სიბრტყეებს შორის ინტენსიურ და წინააღმდეგობრივ გარდასახვას შავ-თეთრი ან მონოქრომული ნახატებით. სხვადასხვა ფიგურების დინამიური განვითარება ქმნის გამოსახულებებს გარკვეულ ფერებში,  იმის მიხედვით, თუ როგორ ამუშავებს და აღიქვამს  თვალის გუგა სინათლეს. როგორც გოეთე აღწერდა თავის „ფერთა თეორია“-ში – ზღვარზე, სადაც ნათელი და ბნელი ხვდება ერთმანეთს, წარმოიქმნება ფერი, ვინაიდან სინათლე და სიბნელე ორი ცენტრალური ძალაა ფერის შექმნისას.

ოპ არტის ერთ-ერთი პირველი მიმდევარი, შეიძლება  ითქვას ფუძემდებელიც, უნგრელი მხატვარი ვიქტორ ვასარელი იყო. მისი შემოქმედება რამდენიმე სტილს მოიცავს, მაგრამ ყველაზე წარმატებული თეთრისა და შავის კომბინაციით შექმნილი ნამუშევრები აღმოჩნდა. Movement in squares - Bridget Riley - Copyვასარელის ერთ-ერთი ძალიან ცნობილი ტილო „ვეგა“ ჯერ კიდევ 1957 წელს შეიქმნა, როცა ტერმინი ოპ არტი არც არსებობდა. კვადრატულ ბადეზე რამდენიმე მრუდე ხაზი იძლევა ჩაღრმავებისა და ამოღრმავების ეფექტს და ტოვებს შთაბეჭდილებას, რომ არ არის ერთი სიბრტე.  ნახატი გვიჩვენებს საწინააღმდეგო მონაცემებს და ჩვენ აღვიქვამთ მოძრავ  სფეროებს. რეალურად ნამუშევარი დიაგონალებისგან, ჰორიზონტალებისა და ვერტიკალებისაგანაა შექმნილი.

 

Bridget Riley – Movement in Squares

მიმდინარეობის  კიდევ ერთი ცნობილი წარმომადგენელია  ინგლისელი მხატვარი ბრიჯიტ რაილი. რაილის ნამუშევრები გეომეტრიული ფიგურების მრავალფეროვნებაა, რომელიც მოძრაობის ან უხილავი ფერის შეგრძნებას იწვევს. მის პირველ გამოფენაზე წარმოდგენილმა ნამუშევრებმა მნახველებში ზღვის ავადმყოფობისა და ვარდნის შეგრძნება გამოიწვია. 1960 წელს ვენეციის ბიენალეს ფესტივალზე  მხატვარმა მოაწყო ფუტურისტული და ოპ არტის სტილში შესრულებული ნამუშევრების მასშტაბური გამოფენა, ეს უკანასკნელი იმ დროისთვის ახალი და აბსოლუტურად უცხო იყო.

Victor Vasarely Museum

Victor Vasarely Museum

ოპ არტი არქიტექტურაში საკმაოდ საინტერესოდ და დამაბნევლად გამოიყურება, რადგან მისი წარმოდგენა დიდ სივრცეზე ხშირ შემთხვევაში შიშს იწვევს ხოლმე.  ამის ცალსახა მაგალითია „კაფე ვოლი“ მელბურნში.  შენობის ფასადი დიდი შავ-თეთრი ოთხკუთხედებისგან შედგება, რომელიც მოწითალო ხაზებითაა გამოყოფილი. იგი მელბურნის ერთ-ერთ ღირსშესანიშნაობათაც კი ითვლება და მის სანახავად უამრავი ტურისტი მიდის.  შენობის შეხედვისას ჩნდება შეგრძნება, რომ ის მოძრაობს და ნაწილებად იშლება. შესაბამისად, ის ადგილობრივებისთვის არც თუ ისე საყვარელი ადგილია. ერთ-ერთი გამორჩეული არქიტექტურული ნაგებობა ვიქტორ ვასარელის მუზეუმია საფრანგეთში. Café Wall Illusionვასარელის სჯეროდა წარმოსახვითი ილუზიისა და არქიტექტურის  ურთიერთობის.  შენობის ფასადი გიგანტური კვადრატული ფილებითაა შემოსაზღვრული, რომელიც მონაცვლეობით თეთრად და შავად შეიღება. მასში მოთავსებული საპირისპირო ფერის წრეები თვალს აღიზიანებს და იწვევს წინაღობას.    შენობის შორიდან ყურებისას ჩნდება ასოციაცია, რომ კვადრატებში ჩაყოლებული ბურთები მონაცვლეობით მოძრაობენ, ხოლო თეთრი ნაწილები დღის განათებაზე თვალისთვის უხილავი ხდება, რადგან მზის სხივების ზემოქმედებით სითეთრეს და ცის  ტონს  თვალი თითქმის ერთნაირად აღიქვამს.  შედეგად გვეჩვენება რომ სიცარიელეში მხოლოდ შავი ბურთებია.

Marc Jacobs Spring 2013

Marc Jacobs Spring 2013

მოდის სფეროში ოპ არტის მოტივებზე შექმნილი ერთ-ერთი ყველაზე დასამახსოვრებელი კოლექცია წარმოადგინა მარკ ჯეკობსმა 2013 წლის გაზაფხულზე. დიზაინერის მოდელი 60-იანი წლების ქალია. სამოსი სწორი, მარტივი სილუეტისგანაა შექმნილი. კოლექციაში მთავარ როლს  ძირითადად შავი და თეთრი ხაზებისგან შექმნილი  მატერიები ასრულებს.  მარკ ჯეკობსმა ამ ოპტიკური ალუზიით მიიღო ოპტიკური ილუზია. სხვადასხვა სისქისა და ფორმის შავ-თეთრი ხაზებისგან შექმნილმა სამოსმა, მნიშვნელოვანი ნიშა შექმნა არა მხოლოდ დიზაინერის, არამედ მოდის ისტორიაშიც.  “ ახალგაზრდა ქალმა საჭიროა იცოდეს, რომ სექსუალური მიმზიდველობა არ არის მხოლოდ სიშიშვლე“ – განაცხადა კოლექციის შესახებ დიზინერმა. სილუეტებისა და  გამოყენებული მატერიების მიუხედავად, კოლექცია საკმაოდ ტენდენციურად გამოიყურებოდა. მიღწეული ეფექტით მნახველს არ შექმნია შთაბეჭდილება, რომ სამოსი 60-იანი წლების მოდას ეხმიანებოდა. მარკ ჯეკობსის ლუქი ყოველთვის ძლიერი, უნიკალური და შემოქმედებითია. წარსულზე, ისტორიაზე დაფუძნებული, იგი აუცილებლად პასუხობს ტენდენციებს. ჯეკობსმა ოპ არტის  კოლექციიათ დაგვანახა რადიკალური გადასვლა სტილში, 60-იანი წლების ახალგაზრდა  გოგონასა და თანამედროვე, გვიანდელი დეკადის თავისუფალ სულს შორის.

marc-jacobs-spring-2013კოლექციაში მრავლად იყო წარმოდგენილი გრძელი მაისურები, რომლებსაც კაბის დატვირთვა ჰქონდა და ასევე გრძელი, სწორი კაბები, რომლებიც შარვლის ან კომბინეზონის შთაბეჭდილებას ტოვებდა. საზოგადოებისთვის შეთავაზებულ ამ გაუგებრობას ემატებოდა ოპტიკური ილუზია ანუ ოპ არტი, რამაც მაყურებლის თვალის ორმაგი გაღიზიანება და ამავდროულად დიდი მოწონება დაიმსახურა.

 

Untitled collageუამრავ გავლენასთთან ერთად, ოპ არტის ინსპირაცია მკაფიოდ იგრძნობა ალექსანდრ მაკქუინის 2009 წლის შემოდგომის კოლექციაში. სამოსის დრამატულობას უფრო ამძაფრებდა და თვალისმომჭრელს ხდიდა შავ-თეთრი ფერების თამაში. კოლექცია, მეოცე საუკუნის ტენდენციებისა და ქსოვილების სტრუქტურით, მომავლის ქალბატონის ილუზიას წარმოადგენდა. ლუქებში იგრძნობა შანელისა და დიორის მოდის სახლების გავლენაც, მაგრამ ნებისმიერი დეტალის ცალკე ხილვისას, მარტივად აღიქმება ავტორის ხელი. ოპ არტული ილუზიის ხელშეწყობით სხვადასხვა ზომის  ერთი კონკრეტული პრინტი, მაკქუინის აღნიშნულ კოლექციას მართლაც წარმოუდგენლად შთამბეჭდავს ხდის.

Balmain spring 2013შესაძლოა ითქვას, არც მოდის სახლ ბალმენის  ამჟამინდელი კრეატიული დირექტორი, ოლივერ როუსტენია გულგრილი ოპ არტის მიმართ. მის ყოველ კოლექციაში შევხდებით რამდენიმე ლუქს ოპტიკური ილუზიის გამოყენებით.  ბალმენი სხვადასხვა ტექნიკით შესრულებული სამოსით იწონებს თავს, რომელთა შორის მრავლადაა შავ-თეთრი, სხვადასხვა ფორმისა და ზომის გეომეტრიული ფიგურები. ასევე, ოპ არტის გავლენა მკაფიოა ლუი ვიტონის 2013 წლის გაზაფხულის კოლექციაში, იმ განსხვავებით, რომ მის სამოსში  ჭარბობს ფერები და ფიგურებიდან კი მხოლოდ კვადრატებს შევხვდებით. აღსანიშნავია ის ფაქტიც, რომ ამ პერიოდში ლუი ვიტონის მოდის სახლს ხელმძღვანელობდა მარკ ჯეკობსი, რომელიც მოდაში ოპ არტის გამოყენების დიდოსტატია. შემოთავაზებული ექვს წუთიანი არტ ინსტალაცია განსხვავებულ ფორმატს წარმოადგენდა და არ იმეორებდა დიზაინერის საკუთარი ხაზის ტექნიკას.   Louis-Vuitton-Spring-2013

Louis Vuitton  Spring 2013

 

21369102_1235907316555255_511489677905536205_n

 

ტექსტი: ივანე ქეშიკაშვილი

ჟურნალი ბომონდის სექტემბრის ნომერი

 

 

 

დონენენეე

Advertisements

სანაპირო მოდის ევოლუცია

IMG_1948

ზაფხული ყველასთვის საყვარელი წელიწადის დროა. მასთან ასოცირდება სითბო, მზე, ზღვა, დასვენება, აუზი და, რაც მთავარია, რუჯი.ზაფხულის დადგომისთანავე ყველა განსაკუთრებით ემზადება, რომ განაახლოს გარდერობი, შეიძინოს ახალი საცურაო კოსტიუმი, ჩანთა, სათვალე და სხვა აქსესუარები.

იდეა, რომ ზღვა არა მარტო მეზღვაურების სამყოფელი, არამედ სასიამოვნო და სასარგებლო დასასვენებელი ადგილი შეიძლებოდა ყოფილიყო, მეთვრამეტე საუკუნეში გაჩნდა. თავდაპირველად ტანსაცმელს საბანაო ეტლში იცვლიდნენ, შემდეგ ეტლს ზღვაში ჩააგორებდნენ და მალულად ჩადიოდნენ წყალში. ეს გამოწვეული იყო იმით, რომ საცურაო კოსტიუმით სანაპიროზე გამოჩენა სირცხვილად ითვლებოდა. დღესდღეობით მრავალი სილუეტის საცურაო კოსტიუმს შეხვდებით, მაგრამ ჯერ კიდევ გასული საუკუნის დასაწყისში ბიკინის ჩაცმა წარმოუდგენლად მიაჩნდათ. საცურაო კოსტიუმების განსხვავებული სტილის ჩამოყალიბება განაპირობა სხვადასხვა ქვეყნის რელიგიურმა, სოციალურმა და კულტურულმა მდგომარეობამ. ანტიკურ პერიოდში არსებობდა სამი ტიპის აუზები: ქალთა, მამაკაცთა და შერეული. ადამიანები თავიანთი სურვილისამებრ ირჩევდნენ, სად გაგრილებულიყვნენ და, როგორც წესი, ცურვისას სხეულს არ იფარავდნენ, მაგრამ რამდენიმე რომაულ ფრესკაში შემორჩენილია პირველი ბიკინის ნიმუშები.

qeshik5

მოგვიანებით, შუა საუკუნეებიდან დაწყებული, ვიქტორიანული ეპოქით დამთავრებული, განსაკუთრებულად შეფუთულები ცურავდნენ. ქალები რამდენიმე ფენა უხეში ტილოს კაბებით იმოსებოდნენ, რომ სხეულის რომელიმე ნაწილი არ გამოსჩენოდათ, ან სველი სამოსი ტანზე არ მიკვროდათ. ჩაცმულები ცურავდნენ მამაკაცებიც.

მიშელინ ბერნარდი პირველი მანდილოსანი ვისაც საცურაო კოსტიუმი ეცვამეოცე საუკუნის დასაწყისიდან დღემდე, საცურაო კოსტიუმი უფრო შიშველი და გაბედული ხდება. პირველი ბიკინი ძველი რომაელების შემდეგ 1946 წელს გამოჩნდა. მისი დიზაინერი ფრანგი ინჟინერი ლუის რეარი იყო, ხოლო პირველი მანდილოსანი, რომელმაც გაბედული ნაბიჯი გადადგა იმ პერიოდში და ბიკინით იპოზიორა, ფრანგი მოცეკვავე მიშელინ ბერნარდინი გახლდათ. სამწუხაროდ, იმ ეპოქის ყველა მოდელმა უარი განაცხადა ახალი საცურაო კოსტიუმით პოზირებაზე. ამ ფოტოს გამოჩენიდან კი სულ რამდენიმე დღეში, პარიზი სკანდალებმა მოიცვა. პრესა შოკირებული წერდა: „ნახეთ ადამიანის სამოსი, სადაც ჭიპი ჩანს“. ალბათ, ერთ-ერთი უმთავრესი მიზეზი, რამაც სხეულის გამოჩენას ზღვასა და საცურაო აუზებზე შეუწყო ხელი, რუჯის ტენდენცია გახლდათ. რუჯის ისტორია ძველი ეგვიპტიდან იწყება. მათ კიდევ ერთხელ გაუსწრეს დროს, როდესაც სხეულის ნარინჯისფრად და ყვითლად გაფერადება დაიწყეს, რაც თანამედროვე გარუჯვის წინამორბედი აღმოჩნდა. ისტორიაში არ არსებობს ფაქტი, რომ ადრეულ პერიოდში გარუჯვა ტენდენციური ყოფილიყო. ხშირ შემთხვევაში მზემოკიდებული მეომრები თუ მოგზაურები დიდ აღფრთოვანებას იწვევდნენ ხალხში, მაგრამ არავის უფიქრია მათთვის მიებაძა და სხეული მზისთვის მიეფიცხებინა. გარუჯული კანი მონასთან ან უბრალო მუშასთან ასოცირდებოდა, რომელსაც მზისგულზე ხანგრძლივი მუშაობა უწევდა და შესაბამისად, მოდურადაც არ ითვლებოდა. გასული საუკუნის დასაწყისში ყველაფერი შეიცვალა.

qeshik6

მეოცე საუკუნე ახალი შესაძლებლობების ჯაჭვია. მოდისა თუ თავის მოვლის კულტურის განვითარებაც, სწორედ მეოცე საუკუნის ადრეულ წლებში დაიწყო. რუჯი 1920 წლამდე საკმაოდ დაბალ სოციუმთან ასოცირდებოდა, ვიდრე ფრანგი დიზაინერი კოკო შანელი ყველაფერს თავდაყირა არ დააყენებდა. კოკო შანელი 1920 წელს ფრანგული რივიერიდან მზისგან დამწვარი დაბრუნდა. და ეს ფაქტი, რა თქმა უნდა, გახდა მაღალი საზოგადოებისთვის მიზეზი, რომ დაეწყოთ მზეზე საათობით გარუჯვა.  თითქმის ასი წლის შემდეგაც, კოკო შანელის მიერ შემთხვევით წამოწყებული ტენდენცია, აქტიურად გრძელდება.  ცნება გარუჯვა  ბიზნესადაც იქცა. არ დააყოვნა გასარუჯი საშუალებების გამოჩენამაც.  ავტორუჯის გამოყენება პირველად 1950  წლიდან დაიწყეს. რუჯის ეფექტის მისაღები საშუალებები ძირითადად ინს შეიცავდა, რომლის სისტემატიური მოხმარებისგან კანი ნარინჯისფერი ხდებოდა და სპეციფიკურ სუნსაც გამოყოფდა. მეოცე საუკუნის მიწურულს მსოფლიოში სოლარიუმების ბუმი დაიწყო და მოდის მიმდევრების საყვარელი გასარუჯი საშუალება გახდა. ულტრაიისფერი ნათურების ქვეშ, მოკლე დროში, კარგ ეფექტს იღებდნენ. დღესდღეობით დაგროვდა საკმარისი ინფორმაცია მავნებელი გამოსხივების შესახებ. მსოფლიო ინდუსტრიამაც არ დააყოვნა და სპეციალური გასარუჯი სპრეი შემოიღო ხმარებაში. დღეს რუჯი საკმაოდ ტენდენციურია და ყველა, როგორც ქალბატონი, ასევე მამაკაცი, მიმართავს სხვადასხვა გასარუჯ საშუალებას.

აქვე მინდა შემოგთავაზოთ რამდენიმე სასარგებლო საზაფხულო რჩევა:

qeshik3


აუცილებლად გამოიყენეთ მზისგან დამცავი კრემი. შესაძლოა, თამამად ირუჯებოდეთ და არ უჩიოდეთ მზისგან დამწვრობას, მაგრამ პირველ დღეებში ნებისმიერი სახის კანისთვის კარგია მზისგან დამცავი, თუნდაც დაბალპროცენტიანი კრემის გამოყენება. წლის მანძილზე, ზაფხულიდან ზაფხულამდე, კანი ხდება დაუცველი და დიდი რაოდენობით მზის სხივების მიღება ხშირ შემთხვევაში დამწვრობას ან გაუხეშებას იწვევს.


არასოდეს გაჩერდეთ სანაპიროსა ან აუზზე ე.წ. პიკ პერიოდში (11 საათიდან 4 საათამდე). დროის ამ მონაკვეთში, მზე ყველაზე რადიაციულ სხივებს გამოყოფს, რაც პირდაპირ ებრძვის არა მარტო კანს, არამედ კანქვეშა ორგანოებსაც. შუა დღის მზეზე წოლა უტოლდება სოლარიუმში 2 საათის გატარებას.


ეცადეთ, აირჩიოთ დასასვენებელი ადგილი ან ზაფხულის ის მონაკვეთი ზღვაზე ან აუზზე წასასვლელად, როცა ტემბერატურა 32-34 გრადუსს არ აღემატება.


qeshik7

ხშირ შემთხვევაში, საცურაო აუზი ან სანაპირო წითელ ხალიჩად ან პოდიუმად გადაიქცევა ხოლმე. თუ ატარებთ საცურაო კოსტიუმის ზემოდან შემოსაცმელ კიმონოს ან კაბა-ხალათს, გაქვთ ნაჭრის ჩანთა და ფერადი მინის სათვალე, შეიძლება ითქვას, რომ თქვენი ლუქი მთელი სანაპიროს ან საცურაო აუზის აღფრთოვანების საგანია.


ჯანსაღი კვება ყოველთვის მისასალმებელია, მაგრამ განსაკუთრებით კარგია თქვენი სხეულისთვის თუ ჯანსაღ საკვებს, როგორიცაა ბოსტნეული, ხილი, ნატურალური წვენები, უპირატესობას მიანიჭებთ ზაფხულის ცხელ დღეებში, როდესაც დღის დიდ ნაწილს ატარებთ მზის ქვეშ. არასოდეს მიირთვათ ნაყინი და რძის პროდუქტები მზეზე.


qeshik2

სვით დიდი რაოდენობით წყალი! ზაფხულში სხეული ხშირ შემთხვევაში დეჰიდრადაციას განიცდის, განსაკუთრებით მაშინ, როდესაც მზეზე ვატარებთ დიდ დროს. ამ პერიოდში, აუცილებელია მივიღოთ დღეში 8-9 ჭიქა წყალი, მინერალური სასმელი ან უშაქრო ნატურალური წვენი, ჩვენი ჯანმრთელობისთვისა და სხეულის სასურველი ფორმის შესანარჩუნებლად.


აუცილებლად წამოიწყეთ ახალი ჰობი. ზაფხული საუკეთესო წელიწადის დროა რაიმე ახლის წამოსაწყებად. წლის მანძილზე უმეტესად არ გვრჩება დრო საკუთარი ინტერესებისთვის, ზაფხული კი გვაძლევს ამის საშუალებას. ზღვაზე და საცურაო აუზზეც კარგი იქნება თუ დაკავდებით აქვა აერობიკით, იოგით, წაიკითხავთ წიგნს ან თუნდაც დაწერთ რაიმე ჩანახატს. ერთი სიტყვით, არც თუ ისე  სასარგებლო რუჯის მიღების დროსაც კი, შეგვიძლია დავგეგმოთ ჩვენთვის სასარგებლო აქტივობები.


გადაღება შედგა სასტუმრო Radisson Blue Iveria-ს ღია საცურაო აუზზე.  აქ, ქალაქის ცენტრში, თქვენ გელოდებათ მშვიდი და კომფორტული გარემო  გულისხმიერი პერსონალითა და არაჩვეულებრივი ხედებით. საცურაო კოსტიუმებითა და აქსესუარებით უზრუნველგვყო ბრენდმა Renew, რომელიც ქართველ მომხმარებელს სთავაზობს ტენდენციურ და ხარისხიან საცურაო კოსტიუმებსა და აქსესუარებს.

20621047_1215853625227291_396328808040541058_n

 

ტექსტი: ივანე ქეშიკაშვილი

ფოტო: გიორგი ჟამერაშვილი

მოდელები: ელენე კოპალეიშვილი და ნესტან ხახუბია

ლოკაცია: სასთუმრო Radisson Blue Iveria

სამოსი და აქსესუარები: Renew

https://www.beaumonde.ge/სანაპირომოდისევოლუცია

Untitled

 

 

მოდა ათწლეულების პრიზმაში

IMG_1948

მოდა ყოველდღიურად ვითარდება და იცვლება. შესაბამისად, იცვლება ჩვენი გემოვნებაც და გარეგნული იერსახეც.

ტენდენციების ცვლასთან ერთად იცვლება ჩვენი გარდერობიც. გასულ საუკუნეში გაჩენილმა მოდის სახლებმა მსოფლიოში მოდის ინდუსტრიას ჩაუყარეს საფუძველი. მოდა ნელ-ნელა გადაიქცა ბიზნესად, რომელიც წარმატებული და შემოსავლიანი აღმოჩნდა. მოდის ისტორიას ახსოვს ბევრი ქალბატონი და მამაკაცი, რომლებიც პოპულარულები და ცნობილები განუმეორებელი სტილითა და ჩაცმულობით გახდნენ. აღნიშნული ბლოგით გადავწყვიტე, გაგაცნოთ მოდის განვითარებისა და ცვლილების ყველა დეკადის ტენდენცია, გასული საუკუნის 20-იანი წლებიდან დაწყებული დღემდე. უნდა აღინიშნოს, რომ ამ პროცესში უდიდეს როლს ასრულებდა ყოველი ახალი მოდის სახლის გამოჩენა განსხვავებული ხედვით, იდეებითა და აქცენტებით. ეს პროცესი დღესაც შეუჩერებლად გრძელდება და ყოველი სეზონის მოდის კვირეულებზე ვეცნობით ახალ იდეებს, რომელიც მეორე დღიდანვე ტენდენციური ხდება.

 

 

 

VARIOUS


1920-29
პირველი მსოფლიო ომის დასრულების შემდეგ მსოფლიო ფინანსურმა კრიზისმა მოიცვა, რაც ყველაფერთან ერთად, მოდის ინდუსტრიაზეც აისახა. ბევრი დაწერილა და თქმულა 20-იანი წლების სტილზე. სწორი, სადა სილუეტების გამოჩენა ფაბრიკების ნაკლებობამ და ქსოვილების სიძვირემ გამოიწვია. ამ პერიოდის მოდური ქალბატონის გარდერობში შეხვდებოდით სწორ, სხვადასხვა სიგრძის კაბებს, ქვედაბოლოებსა ან ორეულებს, თექის შლაპებსა და აუცილებლად მარგალიტის გრძელ მძივს, რომელსაც ძირითადად, ზურგზე გადაგდებულს ატარებდნენ. არტდეკოს პერიოდის მოდაში, რომელშიც სწორედ 20-იანი წლები მოიაზრება, პოპულარული გახდა მარტივი გეომეტრიული ფორმებით თამაში. ამ პერიოდის ქალბატონების საყვარელი დიზაინერი, რა თქმა უნდა, კოკო შანელი იყო. სტილის აიკონი კი – მსახიობი გრეტა გარბო.


Marlene-Dietrich-1930
1930-39
1930-იან წლებში ქალებს ყველგან ეცვათ კაბა, სამსახურიდან დაწყებული, წვეულებებით დამთავრებული. ამ პერიოდში პოპულარული გახდა დიდი ზომის პალტოები, რომლებიც კაბის სიგრძეს ფარავდა. შლაპები უკვე ძველმოდური იყო და ეს ატრიბუტი გარდერობიდან ეტაპობრივად გაქრა. სამოსში გაჩნდა ფერები, აპლიკაციები. ყველაზე ტენდენციური ყვავილებიანი აბრეშუმის კაბები იყო. ასევე მოდას დაუბრუნდა ბეწვეული. დიდი პოპულარობით სარგებლობმოდა და ქურქები, ბეწვის შარფები და ჩანთები. ხანდახან ქალბატონები მხარზე მოგდებული მელიებითაც იწონებდნენ თავს. მამაკაცების მოდა უფრო სადა ხდებოდა. ისინი უპირატესობას ლამაზ წინდებსა და გრძელ ხელსახოცებს ანიჭებდნენ. 30-იან წლებში დიდ ხმაურსა და გაოცებას მარლენ დიტრიხის, ჯინჯერ როჯერსისა და ბეტ დეივისის სტილი იწვევდა.


grace kelly 19401940-49
40-იანი წლები მეორე მსოფლიო ომს და კვლავ კრიზისს უკავშირდება. მოდა გამარტივდა, გახდა უფრო სადა და ერთფეროვანი. სამოსიდან გაქრა ნაქარგები, მაგრამ აქტუალურობა შეიძინა ხელთათმანმა. ამ პერიოდში ვერ ნახავდით ქალბატონს, რომელიც ხელთათმანს არ ატარებდა. როგორც ქალის, ასევე მამაკაცის გარდერობში გაჩნდა ბომბერი. თავი იჩინა “მკაცრი მხრების” ტენდენციამ. ბრწყინვალე ქვედაბოლოებითა და დიდი მხრებიანი პიჯაკების კოლექციით 1946 წელს ფრანგული მოდის ასპარეზზე გამოჩნდა Christian Dior, რომლის წარმატებამ არ დააყოვნა. Harpers Baazar-ის იმდროინდელმა რედაქტორმა კარმელ სნოუმ განაცხადა: „დიორი ახალი აქცენტია მოდის ინდუსტრიაში, რომელსაც ვერაფერი შეაჩერებს“. 40-იანი წლების მოდის აიქონები მსახიობი და შემდგომში მონაკოს პრინცესა გრეის კელი და მოცეკვავე და მსახიობი რიტა ჰეივორთი გახდნენ. ისინი იმ პერიოდის დიზაინერების ფავორიტები იყვნენ.


Marilyn Monroe 1950
1950-59
50-იანი წლების მოდაში უამრავი მიმდინარეობა წარმოიშვა. უპირატესობა ენიჭებოდა წელის ზომას, რომლის მიხედვითაც ჩნდებოდა სხვადასხვა დიზაინის სამოსი. ხალხი უფრო თავისუფალი გახდა საკუთარი სტილის არჩევანში. ბევრი მიმდინარეობის გამოჩენამ განაპირობა სამოსის დახარისხება გარემოების მიხედვით. თუ მანამდე ქალბატონები ყველგან გამოსასვლელი კაბებით დადიოდნენ, 50-იან წლებში ისინი უკვე თავისუფლად იცვამდნენ შარვალს, შორტს. სინამდვილეში ყველა ქალს სურდა “საოცნებო პროპორციები“ ჰქონოდა, ისეთი, როგორი სილუეტისთვისაც იქმნებოდა სამოსი პარიზული ჩვენებებისთვის. ამ პერიოდზე საუბარი ალბათ შეუძლებელია მერილინ მონროს ხსენების გარეშე. ფილმში „ჯენტლმენები ირჩევენ ქერებს“ შესრულებული როლის შემდეგ, მერილინი მსოფლიოს სექსსიმბოლო და ამასთანავე, სტილისა და მოდის ღვთაება გახდა. მისი სტილი ყველასთვის მისაბაძი გახდა, რაც მის პოპულარობას წარმოუდგენლად ზრდიდა.


audrey Hepburn 19601960-69
ამ პერიოდის მოდა უფრო და უფრო მრავალფეროვანი ხდებოდა, რასაც ხელი შეუწყო ბრიტანული ჯგუფი The Beatles-ის ჩამოყალიბებამ და მათმა გასაოცარმა პოპულარობამ. ხალხის ყურადღებამ მოდის დედაქალაქიდან ლონდონში გადაინაცვლა. 60-იანი წლების ლუქი უფრო პრიალა და თანამედროვე, სილუეტები კი უფრო მკაცრი გახდა. ტენდენციურად აღარ ითვლებოდა ბეწვი, მაგრამ ხელთათმანები კვლავ პოპულარობას ინარჩუნებდა. ქალბატონები ხშირ შემთხვევაში ირგებდნენ მამაკაცის სამოსს. 60-იან წლებში საფუძველი ჩაეყარა ორ მიმდინარეობას, მაღალ და ყოველდღიურ მოდას. ამ პერიოდის ყველაზე ტენდენციური ქალბატონი მსახიობი ოდრი ჰეპბერნი იყო.


david bowie 19701970-79
70-იან წლებში მოდა რადიკალურად შეიცვალა. დეკადის დასაწყისში ჭრელი და ბრჭყვიალა სამოსი ყველაზე ტენდენციურად ითვლებოდა. ფერადი პრინტებიანი ტანსაცმელი, განურჩევლად სეზონისა, პოპულარობას არ კარგავდა. ტენდენციური გახდა მოკლე შორტები, ტოპები და როლიკები. შარვლები სულ უფრო განიერი ხდებოდა. ეს იყო დისკოს ეპოქა, სადაც გეომეტრიულფიგურებიანი პრინტებით შექმნილი სამოსი გახდა ყოველდღიურობის თანამდევი. 70-იან წლებში ჰიტად იქცა ჯინსი: შარვლები, ქურთუკები, კომბინეზონები. ჯინსს ატარებდა ყველა, განურჩევლად სქესისა და ასაკისა. ქალბატონებმა მიივიწყეს ხელთათმანი, შლაპა და კაბა. ქალმა აისრულა დიდი ხნის ოცნება. ის იცვამდა ყველაფერს, რაც უნდოდა. 70-იანი წლები რევოლუციის პერიოდად გვევლინება მოდის ისტორიაში. ამ პერიოდის მოდის აიკონები მომღერალი შერი და დევიდ ბოუი იყვნენ.


madonna 19801980-89
ამ დეკადაში მოდა მეტად დრამატული ხდება. ნელ-ნელა სადავდება 70-იანების სიკაშკაშე და იცვლება ყველაფერი. ტენდენციური ხდება მუქი და პასტელური ფერები. იქმნება მამაკაცისა და ქალის სადა კოლექციები. ტენდენციურია ტყავის ნაწარმი: შარვლები, ქურთუკები, ჟილეტები, რომლებზეც დამაგრებულია პატარა მეტალის პირამიდები. მოდურია ჯვარი და ჯვრის ფორმის სხვადასხვა აქსესუარი. მოდას უბრუნდება აბრეშუმის ბლუზები. ლიდერობას არ თმობს ჯინსი, ოღონდ განიერი შარვლები იცვლება ვიწროთი და ამასთანავე დახეულია. ამას არაერთგვაროვანი რეაქცია მოჰყვა იმჟამინდელ საზოგადოებაში და ბევრისგან უარყოფითი შეფასებაც მიიღო. ტენდენციური გახდა კინოს ან მულტფილმის გმირების გამოსახულებით დაპრინტული მაისურები. ასევე ქალბატონებმა მოირგეს წაწვეტებული ბიუსტჰალტერი, რომელსაც მაისურების ზემოდანაც ატარებდნენ. 80-იანი წლების სტილის შექმნა ახალი მუსიკალური ჟანრის, პოპის მოტივებს ეფუძნება, ხოლო ფუძემდებლები პოპის დედოფლად წოდებული მადონა და პოპის მეფე მაიკლ ჯექსონი იყვნენ. მათ სრული კულტურული გადატრიალება მოახდინეს 80-იანი წლების მსოფლიოში.


cindy-crawford 19901990-99
გრძელი სპორტული მაისურები, მოკლე შორტები, ბოტასები და ბეისბოლის კეპი – 90-იანი წლების ყველაზე ტენდენციურად ჩაცმული თინეიჯერის ლუქია. ამ პერიოდის მოდა დღემდე დიდი პოპულარობით სარგებლობს მსოფლიოში. ურბანული სტილის დაფუძნება უკავშირდება ჰიპ-ჰოპის წარმოშობას. მოდური გახდა დრედები და წვრილი ნაწნავები. 90-იანი წლების მოდის მთავარი მიმართულება ინდუსტრიული და სამხედრო სტილია. ხალხი თავისი ხელით ქმნიდა აქსესუარებს და მასალად ძირითადად რომელიმე მექანიკური ხელსაწყოს ნაწილებს იყენებდა. პოპულარული გახდა სხვადასხვა დიზაინით შექმნილი ყურსასმენებისა და MP3 მოწყობილობების ტარება, რომელიც აუცილებლად შარვლის ბალთაზე უნდა ყოფილიყო დამაგრებული. 90-იან წლებში გაჩნდა ცნება „ტოპმოდელი“, რომლის კაშკაშა ვარსკვლავები ნაომი კემპბელი, სინდი კროუფორდი, ლინდა ევანგელისტა, კრისტი ტარლიგტონი და კლაუდია შიფერი იყვნენ.


2000-09

2000-იანებში ერთნაირად პოპულარულია ბოლო ათწლეულების ყველა მოდური ტენდენცია. ყველაფერი ისევ ბრჭყვიალა ხდება, აქტიურად ბრუნდება სხვადასხვაფერი ნეონებითა და თვლებით გაფორმებული სამოსი. განიერი ჯინსის შარვლები, მოკლე ჯინსის კაბები და რაც მთავარია, აბრეშუმის მაისურები წვრილ ზონრებზე, რომელიც საღამურის შთაბეჭდილებას ტოვებს. ახლის შექმნის სანაცვლოდ ცვლილებები და სხვადასხვა შტრიხი შევიდა უკვე არსებულში.

ტენდენციური გახდა აკეცილი ჯინსის შარვლები. ყველაზე პოპულარული ფერი კი ვარდისფერი იყო. მოდურად ითვლებოდა მასიური სათვალეები და რეზინისსამაჯურიანი საათები. 2000-იანების ათწლეულის ბოლოს დიზაინერმა ალექსანდრ მაკქუინმა მოდაში გადატრიალება მოახდინა.


2010-17
ხშირად გვესმის ფრაზა, რომ 80-იანი და 90-იანი წლების მოდა დაბრუნდა. ალბათ, სტატიის კითხვის დროს, ამას თავადაც მიხვდებოდით. მოდა დღესაც არ კარგავს აქტუალურობას, უფრო მეტი ადამიანი ცდილობს, გამოიყურებოდეს ტენდენციურად. 2010 წლიდან დღემდე ყველაზე პოპულარული მოდის სახლი ბალენსიაგაა, რომლის კრეატიული დირექტორი, წარმოშობით ქართველი დიზაინერი, დემნა გვასალიაა. დემნაზე ბევრი დაწერილა და თქმულა. დღესდღეობით სთრითვეარი აიძულებს ბევრ მოდის სახლს და დიზაინერს, თავიანთი კოლექცია ხალხის სურვილს შეუსაბამონ. 10-იანი წლები უნისექსურ პერიოდად შეგვიძლია დავასახელოთ. ეს დეკადაა, სადაც ნელ-ნელა ქრება მოდიდან ქალის სილუეტი და ორივე სქესის წარმომადგენლები იცვამენ ერთმანეთის სამოსს. გასული საუკუნის მანძილზე მოდას მიჰყვებოდა ადამიანი, დღეს კი ეს როლები ნელ-ნელა იცვლება და მოდა ხდება ადამიანის ცხოვრების სტილის თანამდევი.


19894757_1189100711235916_8473532525689748243_n

 

ტექსტი: ივანე ქეშიკაშვილი

ჟურნალი ბომონდის ივლისის ნომერი

სილამაზე – მსხვერპლი თუ განწყობა

IMG_1948

სილამაზის ძიება ყოველთვის დიდ რისკს უკავშირდებოდა. მაკიაჟის ტრადიცია უძველესი დროიდან არსებობდა. ძველი ეგვიპტელები მიხვდნენ, რომ თავის მოვლა და მაკიაჟი აუცილებელი იყო. ისინი სახის მოვლის საშუალებად, არც მეტი, არც ნაკლები, სირაქლემის კვერცხის, ნიანგის ექსკრემენტებისა და ღვიის ფოთლების ნიღაბს იკეთებდნენ. ბოლო 4000 წლის განმავლობაში დიდად არ შეცვლილა ჩინელი ქალების მაკიაჟიც. ისინი დაფქული ბრინჯისა და მარგალიტის ფერ-უმარილით უხვად იფარავდნენ სახეს და მცენარეების ექსტრაქტისგან დამზადებულ ტუჩსაცხს ისვამდნენ.

სხვადასხვა სტილური მიმდინარეობა მაკიაჟმა უკვე გასული საუკუნის დასაწყისში შეიძინა. 1930 წელს „ლაშ რულმა“ მომწამვლელი ნივთიერებები წამწამების საღებავში გამოიყენა, რომელიც დიდხანს ძლებდა და ფერს ინარჩუნებდა. იმდროინდელი ქალები აქტიურად იყენებდნენ ამ კოსმეტიკას, რის შედეგადაც სიბრმავის 16 და სიკვდილის რამდენიმე შემთხვევაც დაფიქსირდა. მხოლოდ ამის შემდეგ აკრძალეს ამ ნაწარმის გაყიდვა. ალბათ, ყველასთვის არ არის ცნობილი, რომ პირველი დეპილატორი კრემი „კარემლუ“ ვირთხების საწამლავის გარკვეულ რაოდენობას შეიცავდა. ეს ფაქტები უფრო ამყარებს ყველასთვის ცნობილ მოსაზრებას, რომ „სილამაზე მსხვერპლს მოითხოვს!“ 1760 წელს ირლანდიელი დიდგვაროვანი მარია განინგი ბევრი პუდრის წასმის გამო სისხლის მოწამვლით გარდაიცვალა. პრესამ მას „კოსმეტიკის მსხვერპლი“ უწოდა.
თანამედროვე ადამიანი ხშირად იცვლის ვარცხნილობას, დღეს ეს უფრო მარტივი და ხელმისაწვდომია. ხანგრძლივი და ეფექტიანი სტილის შექმნა დიდ ძალისხმევას მოითხოვს. სტილსა და თავის მოვლაზე საუბრისას, პირველ რიგში, ალბათ გასული საუკუნის ვარსკვლავები, ერთი ეპოქის სრულიად განსხვავებული ქალები გაგვახსენდება – მერილინ მონრო, გრეის კელი, ოდრი ჰეპბერნი, რომლებმაც თავის მოვლისა და სტილის საკუთარი ნიშა შექმნეს.
როდესაც სრულყოფილ პროპორციებზე ვლაპარაკობთ, ყველას უჩნდება დიეტის, პლასტიკური ქირურგიის ან სპორტული დარბაზის ასოციაცია. ფიზიკური სრულყოფისკენ სწრაფვამ, XIX საუკუნის ბოლოს ტრენაჟორების გამოგონებას, უამრავი სამედიცინო პროცედურის დანერგვას დაუდო სათავე. დღესდღეობით თანამედროვე მედიცინა სხეულის ყველა ნაწილის სრულყოფილ კორექციას უზრუნველყოფს. მიუხედავად ამდენი შესაძლებლობისა, სასიხარულოა, რომ ფიზიკური ვარჯიში კვლავაც ტენდენციურია.
ჩემი ბლოგი წარმოგიდგენთ ორი განსხვავებული პროფესიის ქართველ ქალს, რომლებიც, დატვირთული გრაფიკის მიუხედავად, არაჩვეულებრივად გამოიყურებიან. მათთან საუბრისას ნათელი გახდა, რომ ამისთვის უმთავრესია ხასიათი, განწყობა და ყოველდღიური პოზიტივი.
მსახიობი ეკა ჩხეიძე და ტელეწამყვანი ლიკა ევგენიძე გვიყვებიან, როგორ შეიძლება დაუთმო დრო ოჯახს, კარიერას, ახლობლებსა და საკუთარ თავს. ისინი ჩვენს მკითხველს ურჩევენ, იყვნენ მიმზიდველები და პოზიტიურები.

DSC_3088

“- ყოველთვის კარგზე ფიქრს ვიწყებ, რაც შეიძლება მოხდეს იმ დღეს, ან რაც მოხდა გუშინ. დილის დადებით შეტყობინებებს, დადებითადვე ვპასუხობ, რითაც დღის განწყობას ვიქმნი”


ეკა ჩხეიძე

– ყველას ჰგონია, რომ თავის მოვლის განსაკუთრებული საიდუმლო მაქვს. ჩემი საიდუმლო ისაა, რომ უარყოფით ემოციას არ ვიღებ, არც ნეგატიურ ინფორმაცის ვუსმენ. სადაც უარყოფითი ენერგეტიკაა, იქ არ ვჩერდები, მალე მოვდივარ. თუნდაც პოლიტიკა, რომელიც ჩვენზე არაა დამოკიდებული და მაინც ვერაფერს შევცვლი, ვუსმენ, არ ვიტვირთები, არ ვითრგუნები. ვცდილობ, წინასწარ არ ვინერვიულო იმაზე, მომავალში რა მოხდება. არ მიყვარს ადამიანები, რომლებსაც უარყოფითი აურა აქვთ ან სულ წუწუნებენ. ასეთები ჩამოვიშორე, მხოლოდ ხალისიან ადამიანებთან ვმეგობრობ. ყოველთვის კარგ მსმენელად ვითვლებოდი. ეს ჩემი მეგობრების დასკვნაა. ვცდილობ, ჩემ გარშემო დადებითი განწყობა შევქმნა, მაგრამ სანერვიულო შემთხვევებს ვერ გავექცევით. ასეთ დროს თვალები ჩამქრალია და როგორი მაკიაჟიც უნდა გაიკეთო, რაც უნდა ჩაიცვა, არაფერი გიშველის. როდესაც თვალები ასხივებს, ძველი ქურთუკიც მოგიხდება. ვცდილობ, კარგად მეძინოს. როდესაც კარგად გძინავს, არ არსებობს, ცუდ გუნებაზე გაიღვი ძო. ჩემთვის ფორმაში ყოფნა წონასთან ასოცირდება. ჯერჯერობით წონის პრობლემა არ მქონია, ალბათ ეს გენეტიკურიცაა. არასდროს ვყოფილვარ დიეტაზე. არ ვიცი, რატომ, მაგრამ ბავშვობიდან არ მიყვარს მსუყე საჭმელი. დიდად არ ვარ ქართული სამზარეულოს მოტრფიალე. მიყვარს სალათები, ხილი და ბოსტნეული.

 

– დილით პირველად რას აკეთებთ?
– ყოველთვის კარგზე ფიქრს ვიწყებ, რაც შეიძლება მოხდეს იმ დღეს, ან რაც მოხდა გუშინ. დილის დადებით შეტყობინებებს, დადებითადვე ვპასუხობ, რითაც დღის განწყობას ვიქმნი. ადრე ადგომა მეზარება, მაგრამ გამონაკლისს წარმოადგენს ის გარემოება, თუ სადმე მეჩქარება, ეს ფაქტი მახარებს, ეს ჩემთვის ნიშნავს, რომ ვარ საჭირო, რადგან მსახიობის პროფესია ისეთია, შეიძლება ერთ დღეს აქტუალური იყო და რამდენიმე თვე არა. რაც მეტად დაკავებული ვარ, მით მეტს ვასწრებ. მთავარია, არავინ დამავალოს სადილის მომზადება. ეს ჩემთვის სასჯელია.

-თქვენი საყვარელი საუზმე…
-ხაჭო არაჟნით, თაფლით, ჟოლოთი. მიყვარს ყველი და, რა თქმა უნდა, დილით რძიანი ყავა.

– თქვენი ყოველდღიური თავის მოვლის რუტინა…
-მართალია, უმაკიაჟოთაც გავქცეულვარ სახლიდან, მაგრამ მიყვარს მცირე მაკიაჟი. მომწონს პომადა და ტუში, რასაც ყოველ დილით ვისვამ. მაგვიანდება, მაგრამ ამას მაინც გავაკეთებ. ჩემთვის უმთავრესია აბაზანის პროცედურები, სახის, ხელის, ტანის კრემები. დრო, რომელსაც სარკესთან მაკიაჟის წასმისას ვატარებ, ჩემთვის მთელი რიტუალია.

DSC_3097

“წარმოდგენამდე საგრიმიოროში მესაჭიროება რამდე ნიმე საათი და… სცენაზე უკვე სრული გარდასახვა ხდება. სრულიად სხვა ადამიანი ვხდები და ამ დროს დაძაბულობა, დაღლილობა ქრება”


-რომელ კოსმეტიკურ საშუალებებს ვნახავთ თქვენს ხელჩანთაში?
-მძიმე ხელჩანთა მაქვს. ჩემი გრაფიკიდან გამომდინარე, თავის მოვლის საშუალებებიდან დაწყებული, სამოსით დამთავრებული ყველაფერი მაქვს მანქანაში. ხელჩანთაში, რა თქმა უნდა, სუნამო და მოზრდილი კოსმეტიკის ჩანთაა. ხშირად განწყობის ცვლილების გამოც მიწევს იმიჯის შეცვლა. არ ვიცი, რა დროს რა მომინდება, ან დამჭირდება.

-რის მიხედვით არჩევთ სამოსს?
-იმის მიხედვით, სად მივდივარ, მაგრამ ხასიათიც დიდ როლს თამაშობს. ძალიან მიყვარს ჯინსი. კარგი ჯინსი, ჩემი აზრით, ყველანაირ ფეხსაცმელს უხდება. ნაკლებად მიყვარს კაბები. ჩემს გარდერობში ბევრ კაბას ნახავთ, მაგრამ იშვიათად ვიცვამ. კაბა ჩემთვის ზედმეტად გამოპრანჭვასთან ასოცირდება.

– განტვირთვას როგორ ახერხებთ?
-დაძაბული გრაფიკიდან გამომდინარე, სპექტაკლზე დაღლილი მივდივარ. მაგრამ წარმოდგენამდე საგრიმიოროში მესაჭიროება რამდე ნიმე საათი და… სცენაზე უკვე სრული გარდასახვა ხდება. სრულიად სხვა ადამიანი ვხდები და ამ დროს დაძაბულობა, დაღლილობა ქრება. მითამაშია სპექტაკლი სიცხიანსაც, მაგრამ ეს არ მიგრძნია. მართალია, სცენიდან გასულს მუხლები მომკვეთია, მაგრამ სცენაზე არა.

-რა არის საჭირო, რომ თავდაჯერებულად გამოიყურებოდეთ?
-თავდაჯერებულს გარემო მხდის. როცა გრძნობ სიყვარულს, გვერდზე მყოფებს შენი ყოფნა უხარიათ, ზოგადად არსებობა და ის ფაქტი, რომ საჭირო ხარ, თავდაჯერებულს გხდის. როგორც კი ეჭვი გაგიჩნდება, ითრგუნები, საკუთარ თავთან ბევრი კითხვა გიჩნდება. ამ დროს თვითშეფასება იკლებს. არიან ადამიანები, რომლებიც საკუთარ თავს არწმუნებენ და თამაშობენ, რომ ძალიან თავდაჯერებულები არიან. ეს უკვე დიდი კომპლექსია და ასეთი ადამიანი, ვფიქრობ, ყალბია.

– გამოგიყენებიათ პლასტიკური ქირურგია და რა აზრის ხართ მსგავს პროცედურებზე?
-პლასტიკური ქირურგისთვის არ მიმიმართავს, მაგრამ დადებითად ვარ განწყობილი. უბრალოდ არ მომწონს, ყველა ადამიანი რომ ერთმანეთს ემსგავსება, ინდივიდუალურობას ვაფასებ. თავის მოვლაში, ვფიქრობ, არც ერთი ხერხის გამოყენება ცუდი არ არის. მომწონს, როცა ქალს აქვს ამის სტიმული, შესაძლებლობა და სურვილი. ცუდია, რომ ხშირ შემთხვევაში აქვთ ერთნაირი მკერდი, ტუჩი, ცხვირი. პერიოდულად მეზოთერაპიას, ბიორევიტალიზაციას მივმართავ.

 

– რას ურჩევთ ჩვენს მკითხველ ქალბატონებს?
– ვფიქრობ, გადასარევი ქალბატონები გვყავს და ზოგადად ლამაზი ერი ვართ. მთავარია, განწყობა. ყველას ვუსურვებ კარგ განწყობას, ხალისსა და სტიმულს, რომ მოუარონ თავს მეუღლის, შვილის, საქმის, მეგობრისა თუ საკუთარი თავის გამო. ჩემი აზრით, ყველა შვილს სიამოვნებს, როდესაც დედას ხედავს ხალისიანსა და მოვლილს.

 


DSC_3368

“ორი შვილი მყავს და სულ ვცდილობ, არ შევზღუდო არაფერში, რომ ბოლომდე გაშალონ ფრთები. ვაძლევ სრულ თავისუფლებას, რომ თვითონ გადაწყვიტონ, რა ან რისი კეთება უნდათ.”


ლიკა ევგენიძე

 

– არ ვარ სალონების დიდი მოყვარული, იშვიათად დავდივარ სილამაზის ცენტრებში. ყოველთვის ჩემით ვიკეთებ თმას, მაკიაჟს. თავის მოსავლელად დრო გამოყოფილი მაქვს სახლში, რადგან დღესდღეობით ნაკლებად გვცალია სხვადასხვა ადგილას სასიარულოდ. წლების განმავლობაში იცვლება ადამიანების სტილი, ყოველდღიურად ვითარდება ჩვენი გემოვნებაც. ჩემი ყოველდღიური ჩაცმულობა, შესაძლოა, ხასიათიდან და განწყობიდან გამომდინარე, განსხვავებული იყოს.

– რითი იწყებ დღეს?
– ყოველთვის მეჩქარება. ჩემი ოცნებაა, შინიდან მშვიდად გავიდე, დავლიო ყავა, ვისაუზმო, მაგრამ ამას ვერასოდეს ვახერხებ. გამოსაფხიზლებლად ყოველ დილით ვიღებ შხაპს, უცებ ვწესრიგდები და გავრბივარ ტელევიზიაში. ჩემი სამსახური მოითხოვს, რომ სულ კარგ ფორმაში ვიყო.

– რომელია შენი საყვარელი საკვები და როგორ იკვებები?

– ჭამა დიდად არ მიყვარს. შეიძლება მთელი დღე გავიდეს და ჭამა არც გამახსენდეს. ვიკვებები ჯანსაღად, არ მიყვარს მძიმე და ცხიმიანი საჭმელი, არ ვვახშმობ გვიან. ვცდილობ, საღამოს 8 საათის შემდეგ არ ვჭამო. სხვათა შორის, მახასიათებს საჭმლის ამოჩემება. _ რა საშუალებებით უვლი თავს?
– დღისა და ღამის დამატენიანებელი კრემებით. მიყვარს ჩ ვიტამინის სერუმი, რასაც ყოველდღიურად ვისვამ, აგრეთვე ინდური თიხის ნიღაბი. ყოველ საღამოს, მაკიაჟის მოშორების შემდეგ, სპეციალური ჯაგრისით ვიმუშავებ სახეს და ვისვამ დამატენიანებელ კრემს, ეს ჩემი ყოველდღიური ტრადიციაა.

ნივთი, რომელიც სულ თან გაქვს…

– რა თქმა უნდა, ტელეფონის დამტენი. მიუხედავად ჩანთის ზომისა, სულ თან ვატარებ მზის სათვალეს, უფერულ ტუჩსაცხსა და თვალის ფანქარს. ამ ნივთების გარეშე შინიდან არასდროს გავდივარ.

– დასვენებას როდის ახერხებ?
– უკვე მრავალი წელია ვვარჯიშობ. ვანაცვლებ პილატეს, იოგას, ტრენაჟორებს, რადგან მივხვდი, რომ ასე განტვირთვა უფრო ეფექტიანია. ვარჯიში მნიშვნელოვანია არა მარტო ფიზიკური, არამედ მენტალური მდგომარეობისთვისაც. ეს ჩემთვის სტრესის მოხსნის საუკეთესო საშუალებაა. რაც მთავარია, ყოველთვის ვუსმენ მუსიკას. მუსიკით ვცხოვრობ, აბაზანიდან დაწყებული, მანქანით დამთავრებული.

DSC_3394

“ჩემი ხასიათიდან გამომდინარე, ვიმოსები და ვიძენ ტანსაცმელს. მიყვარს ვილიამსბურგის მაღაზიები ნიუ-იორკში, სადაც არის ახალგაზრდა, ნაკლებად ცნობილი დიზაინერების მაღაზიები, რომლებშიც არ იყიდება მასობრივი ნივთები.”


– სამოსს რის მიხედვით არჩევ, შენი საყვარელი ბრენდი. უპირატესობას მხოლოდ ბრენდს ანიჭებ?
– არა. არ მაქვს ამოჩემებული ბრენდი, არც ტენდენციების მოყვარული ვარ. არის ხალხი, ვისაც უხდება თუ არა, ან მოსწონს თუ არა, მაინც ტენდენციურად იმოსება, მე ნაკლებად განვეკუთვნები მათ კატეგორიას. ჩემი ხასიათიდან გამომდინარე, ვიმოსები და ვიძენ ტანსაცმელს. მიყვარს ვილიამსბურგის მაღაზიები ნიუ-იორკში, სადაც არის ახალგაზრდა, ნაკლებად ცნობილი დიზაინერების მაღაზიები, რომლებშიც არ იყიდება მასობრივი ნივთები. საღამოებსა და წვეულებებზე ხშირად აცვიათ ერთნაირი სამოსი, იმიტომ, რომ მოდურია. ასეთი ტიპის მაღაზიებში კი განსხვავებული ტანსაცმელი იყიდება, რაც მასაზე არაა გათვლილი. მიყვარს ჰენდმეიდ და ვინტაჟშოფები.

-პლასტიკური ქირურგისთვის თუ მიგიმართავს?
– არა. ვცდილობ, სახის კანის მოსავლელად კოსმეტოლოგს მივმართო. მხოლოდ მეზოთერაპია მაქვს გაკეთებული. მსგავსი პროცედურები მეზარება, არ მიყვარს, ვერ ვასწრებ, სულ მენანება დრო კოსმეტოლოგიურ კლინიკებში სასიარულოდ. ზოგადად, ვისაც რა უხდება და ერგება, ის უნდა გაიკეთოს. ჩემი აზრით, პლასტიკური ქირურგია არ უნდა გადაიზარდოს მანიაკალურად დაუსრულებელ ექსპერიმენტებში, რის შედეგსაც არაერთხელ ვხვდებით.
-რა აზრის ხარ სვირინგზე, პირსინგზე?
– მომწონს და მაქვს სამი სვირინგი. ზოგადად, ვისაც რა სურს, ის უნდა გააკეთოს. ორი შვილი მყავს და სულ ვცდილობ, არ შევზღუდო არაფერში, რომ ბოლომდე გაშალონ ფრთები. ვაძლევ სრულ თავისუფლებას, რომ თვითონ გადაწყვიტონ, რა ან რისი კეთება უნდათ. შესაბამისად, ყველა ადამიანმა თვითონ უნდა აირჩიოს, ატაროს თუ არა სვირინგი ან პირსინგი.

-რას ურჩევ ქალებს, რომლებიც ვერ ახერხებენ თავის მოვლას?
– ოთხი წელი დავუთმე შვილებს და მთლიანად გადართული ვიყავი მათ აღზრდაზე. ეს უდიდესი პასუხისმგებლობა და დიდი შრომაა, მაგრამ ვახერხებდი, მცირე დრო მაინც დამეთმო საკუთარი თავისთვის. ვარჯიში არ შემიწყვეტია, რაც ფორმის შენარჩუნებაში მეხმარებოდა. ვარჯიში არ ნიშნავს აუცილებლად სპორტდარბაზში სიარულს, სახლში ყოველდღიურად ნახევარი საათიც სრულიად საკმარისია ამისთვის.

 

18341795_1142351592577495_6430407819635655287_n

 

ტექსტი: ივანე ქეშიკაშვილი
ფოტო: გიორგი ჟამერაშვილი
ლოკაცია: რესტორანი Birdy

ჟურნალი ბომონდი, მაისის ნომერი 2017

 

1eklik